మాస్కో ప్రభుత్వంతో జీవీఎంసీ చారిత్రాత్మక సహకార ఒప్పందం. *ఆధునిక పట్టణ రవాణా, డిజిటల్ ఆవిష్కరణలు, పారిశ్రామిక అభివృద్ధికి అంతర్జాతీయ భాగస్వామ్యం. *విశాఖపట్నం ఎకనామిక్ రీజియన్ (VER) అభివృద్ధిని మరింత బలోపేతం చేసే మరో కీలక అడుగు.

.                      K.V.SHARMA EDITOR 
విశాఖపట్నం, ఆగస్టు 3:గ్రేటర్ విశాఖపట్నం మున్సిపల్ కార్పొరేషన్ (జీవీఎంసీ) మరియు రష్యా సమాఖ్యలోని మాస్కో ప్రభుత్వం మధ్య కుదిరిన చారిత్రాత్మక మెమోరాండం ఆఫ్ కోఆపరేషన్ (MoC) విశాఖపట్నాన్ని ప్రపంచస్థాయి పోటీతత్వం కలిగిన, స్మార్ట్, సుస్థిర నగరంగా తీర్చిదిద్దే దిశగా ఒక కీలక మైలురాయిగా నిలుస్తుందని జీవీఎంసీ కమిషనర్ కేతన్ గార్గ్ తెలిపారు.

సోమవారం ఆయన విడుదల చేసిన ఒక పత్రికా ప్రకటనలో మాట్లాడుతూ, ఆంధ్రప్రదేశ్ ముఖ్యమంత్రి  నారా చంద్రబాబు నాయుడు దూరదృష్టి, మార్గదర్శకత్వంలో కుదిరిన ఈ అంతర్జాతీయ భాగస్వామ్యం ద్వారా సుస్థిర పట్టణ రవాణా, డిజిటల్ ఆవిష్కరణలు, స్మార్ట్ మొబిలిటీ, సాంకేతిక పరిజ్ఞాన బదిలీ, పారిశ్రామిక సహకారం వంటి రంగాల్లో ప్రపంచస్థాయి ఉత్తమ విధానాలను విశాఖపట్నంలో అమలు చేసే అవకాశం లభిస్తుందని తెలిపారు. ఈ భాగస్వామ్యం ద్వారా విశాఖపట్నం ఎకనామిక్ రీజియన్ (VER) ఆంధ్రప్రదేశ్‌లో ఆర్థికాభివృద్ధి, సాంకేతిక ఆవిష్కరణలకు ప్రధాన కేంద్రంగా మరింత అభివృద్ధి చెందేందుకు దోహదపడుతుందని పేర్కొన్నారు.

ఈ సందర్భంగా కమిషనర్ మాట్లాడుతూ, మాస్కోలో నిర్వహించిన 5వ ఇంటర్నేషనల్ ట్రాన్స్‌పోర్ట్ సమ్మిట్ సందర్భంగా తాను, మాస్కో డిప్యూటీ మేయర్ మరియు రవాణా, రహదారి మౌలిక సదుపాయాల అభివృద్ధి శాఖాధిపతి శ్రీ మక్సిమ్ లిక్సుటోవ్ ఈ సహకార ఒప్పందంపై సంతకాలు చేశామని తెలిపారు. ఈ కార్యక్రమంలో విశాఖపట్నం పార్లమెంట్ సభ్యులు  ఎం. శ్రీభరత్ పాల్గొన్నట్లు పేర్కొన్నారు.

సహకారం అందనున్న ప్రధాన రంగాలు (Areas of Cooperation)

1. పట్టణ రవాణా అభివృద్ధి (Urban Transport Development)

ఈ భాగస్వామ్యం ద్వారా క్రింది అంశాల్లో పరస్పర సహకారం అందనుంది:

ఆధునిక, సుస్థిర పట్టణ రవాణా వ్యవస్థల అభివృద్ధి.

సమగ్ర, సుస్థిర రవాణా ప్రణాళికల రూపకల్పన.

ఇంటెలిజెంట్ ట్రాన్స్‌పోర్ట్ సిస్టమ్స్ (ITS) అమలు.

టికెటింగ్ వ్యవస్థల డిజిటలైజేషన్.

2. డిజిటల్ ఆవిష్కరణలు (Digital Innovation)

ఈ భాగస్వామ్యంలో భాగంగా:

రవాణా రంగంలో డిజిటల్ సాంకేతికతల అభివృద్ధి.

పట్టణ రవాణా నిర్వహణలో కృత్రిమ మేధస్సు (AI) వినియోగం.

స్వయంచాలక రవాణా వ్యవస్థలు, అనుబంధ మౌలిక సదుపాయాలపై నైపుణ్యాల పరస్పర మార్పిడి.

Urban Transport Data Projectలో భాగస్వామ్యం.

3. పారిశ్రామిక – సాంకేతిక సహకారం (Industrial & Technology Collaboration)

ఇరు పక్షాలు క్రింది రంగాల్లో కలిసి పనిచేయనున్నాయి:

ఆటోమొబైల్, ఎలక్ట్రానిక్స్ తయారీ రంగాలు.

ఎనర్జీ స్టోరేజ్ వ్యవస్థల అభివృద్ధి.

వెర్టికల్ ట్రాన్స్‌పోర్ట్ పరిష్కారాలు.

సాంకేతిక పరిజ్ఞాన బదిలీ.

అధికారులు, సాంకేతిక నిపుణుల పరస్పర మార్పిడి.

విశాఖపట్నానికి ఈ ఒప్పందం ప్రాముఖ్యత (Significance for Visakhapatnam)

ఈ సందర్భంగా విశాఖపట్నం పార్లమెంట్ సభ్యులు ఎం. శ్రీభరత్ మాట్లాడుతూ, ముఖ్యమంత్రి శ్రీ నారా చంద్రబాబు నాయుడు ఆదేశాల మేరకు ఈ సహకార ఒప్పందం కుదిరిందని తెలిపారు. రష్యాలో అమలవుతున్న అత్యాధునిక రవాణా సాంకేతికతలు, ప్రపంచస్థాయి ఉత్తమ విధానాలను విశాఖపట్నానికి అందుబాటులోకి తీసుకురావడమే ఈ ఒప్పందం ప్రధాన లక్ష్యమని పేర్కొన్నారు.

మున్సిపల్ పరిపాలన మరియు పట్టణాభివృద్ధి శాఖ మంత్రి  పి. నారాయణ మాట్లాడుతూ, ఈ భాగస్వామ్యం ద్వారా విశాఖపట్నం ఎకనామిక్ రీజియన్ (VER) ఆంధ్రప్రదేశ్‌లో సమగ్ర ఆర్థికాభివృద్ధి, సాంకేతిక ఆవిష్కరణలకు ప్రధాన కేంద్రంగా మరింత అభివృద్ధి చెందుతుందని తెలిపారు.

రాష్ట్ర మున్సిపల్ పరిపాలన మరియు పట్టణాభివృద్ధి శాఖ ప్రధాన కార్యదర్శి ఎస్. సురేష్ కుమార్  మాట్లాడుతూ, ఈ భాగస్వామ్యం ద్వారా విజ్ఞాన మార్పిడి, ఉత్తమ విధానాల పరస్పర వినిమయం, పట్టణ రవాణా మరియు డిజిటల్ పరివర్తన రంగాల్లో అత్యాధునిక పరిష్కారాలను అందిపుచ్చుకునే అవకాశం లభిస్తుందని, ఇది విశాఖపట్నంలో సుస్థిర పట్టణాభివృద్ధికి బాటలు వేస్తుందని పేర్కొన్నారు.

చివరగా జీవీఎంసీ కమిషనర్ కేతన్ గార్గ్ మాట్లాడుతూ, ఈ సహకార ఒప్పందం విశాఖపట్నం అభివృద్ధి ప్రయాణంలో ఒక కొత్త అధ్యాయానికి నాంది పలికిందన్నారు.

"మాస్కో ప్రభుత్వంతో కుదిరిన ఈ భాగస్వామ్యం ద్వారా ప్రపంచస్థాయి సాంకేతికతలు, వినూత్న పరిపాలనా విధానాలు, సుస్థిర పట్టణ రవాణా పరిష్కారాలను విశాఖపట్నంలో అమలు చేయాలన్న జీవీఎంసీ సంకల్పానికి మరింత బలం చేకూరుతుంది. ఈ సహకారం ద్వారా విశాఖపట్నం ఎకనామిక్ రీజియన్ (VER) మరింత బలోపేతం కావడంతో పాటు, నగర మౌలిక సదుపాయాల అభివృద్ధి, సాంకేతిక ఆవిష్కరణలు మరియు విశాఖను ప్రపంచస్థాయి పోటీతత్వం కలిగిన స్మార్ట్, సుస్థిర నగరంగా తీర్చిదిద్దాలన్న రాష్ట్ర ప్రభుత్వ లక్ష్య సాధనకు విశేషంగా దోహదపడుతుంది" అని కమిషనర్ తెలిపారు.

పౌర సంబంధాల అధికారి 

జీవీఎంసీ